روابي البناي
صباح الخير، صباح التشريب اللي ريحته تبط الراس من كثر نطاعته، صباح الهريس اللي لونه أدعم من كثر اللحم اللي فيه، صباح خبز العروق اللي كبر جف اليد ومن تحطه بحلج يذوب من حلاته، صباح اللقيمات اللي من كثر قرمشتها تسمع صوت تكسرها بالحلج وانت براس العاير، صباح صب القفشه اللي لونه ذهبي واللي اذا كليت وحده ما تقدر ما تحط الثانية وراها، صباح الفيمتو البارد وقمر الدين، صباح الشهر الفضيل وأيامه الحلوه اللي مثلكم.
مبارك عليكم الشهر وعساكم من عواده وعسى ربي يتقبل صيامكم وقيامكم وصالح اعمالكم ان شاء الله. أدري انها متأخرة بس ما عليه سامحوني. اليوم خامس أيام الشهر الفضيل اللي قاعد يمر بسرعة وبسهولة بس للأسف أنه ليمن اليوم قاعد نشوف نماين من البشر اللي صايمين بس بالاسم، يعني أنهم بس ماخذين الصيام تسكيرة حلج من الفجر وليمن المغرب، فتجدهم يتصرفون تصرفات غريبة ومخجلة لا تتناسب مع حرمة هذا الشهر الفضيل. أنا أدري أن السنة كلها عبادة وصلاة، ولكن الله سبحانه وتعالى خص هذا الشهر الفضيل بشيء من الخصوصية، ففيه دعوة سماوية من الله سبحانه وتعالى للتصالح مع النفس اولا وتهذيبها وتعليمها الصبر ورباطة الجأش والتحلي بالأخلاق السنعة، والشعور بالغير، لهذا أتمنى من بعض النماين اللي قاعدين نشوفها بنهار أو ليل رمضان أن تراعي الله فينا وتخلينا ناخذ اجر هذا الشهر الفضيل، لأن الصراحة الواحد ما وده يعلق على اللي قاعد يشوفه.
نصائح رمضانية
علشان جذي رغبة مني بكسب أجر هذا الشهر الفضيل حبيت اذكر بعض النماين اللي الله بلانا فيها ونشوفها مهدودة بالشوارع والهيئات والوزارات، ببعض النصائح الرمضانية:
• نصيحة خاصة لبعض الموظفات الله يهديني وياهم ما له داعي الترصص ولبس الضيق في نهار رمضان علشان لا ينقض صيام ووضوء الأخوة الأفاضل المراجعين والموظفين اللي معاكم وتاخذون اثمهم ترا انتوا مو ناقصين.
– ما له داعي ظهور الوجه الدراكولي في نهار رمضان الله يخليكم، يعني خففوا من حمرة «الكتشب» وكحل «فرعون الأكبر» اللي واصل اذونكم.
• ما له داعي الحش والنميمه بفلانة وعلنتانة، ترا ما راح يشوي جلودكم بالنار إلا الحش بالناس، واتمنى انكم تتبعون مقولة كل واحد يطل بجيبه ويشوف عيبه احسن.
• ما له داعي التمخطر بالممشى قبل الفطور ولبس التريننج الفوسفوري اللي يبين من بعد 3 امتار.. يعني غصب ترا انا موجودة.
• ما له داعي النفس الخايسة ومد البوز على المراجعين والموظفين اللي معاكم، يعني اللي ما يقدر يواجه الناس وهو صايم يقعد في بيتهم ويجابل الطوفة ليمن يأذن، ويخلي الشغل حق الناس اللي تفتح النفس من الصبح.
• ماله داعي تسكرون الشوارع على خلق الله لما تروحون تصلون التراويح، ترا الله ما أمر بإزعاج الناس وتعطيل مصالحهم.
• ما له داعي الاسطوانة المشروخة كل يوم حق ربعج «واي انا امس ما نمت لأني قعدت اصلي وأقرا قرآن»، ترا اذا سويتي هالشي لازم يصير بينج وبين ربج مو تسوينه broadcast حق العموم.
• ما له داعي من اول يوم برمضان تقولون الله يعينه على الزحمة بالمسجد الكبير، محد قالكم روحوا صلوا بالمسجد، الله معبود بكل مكان.
• ما له داعي المخوزر يعني انت ياللي ما تقدر تمسك روحك من ملاحق بنات الناس وانك تأذيهم، خل يصير عندك غاريه بهالشهر واحترم حرمة هذا الشهر.
• ما له داعي الإزعاج والضحك العالي بالبارتشينات وجابلوا شغلكم وايد احسن، علشان تحللون معاشكم والله يتقبل صيامكم.
• ما له داعي كل اللي حواليج يعرفون انتي شنو مسوية فطور اليوم.
• ما له داعي يصير بوزك شبرين جدامج لأنج اليوم راح تفطرين عند حمواتج ومالج خلق حمواتج.
• ما له داعي مطاردة بطول الفيمتو من جمعية ليمن جمعية علشان تخافون يخلص وما تشربون فيمتو.
• ما له داعي بس تدرون ان في معرض بالمنطقة الفلانية تروحون حتى لو كنتوا ما تبون تشترون بس بلاغة شف علشان يقولون انه شافوكم بالمعرض. • ما له داعي تروحون المسجد وريحتكم كلها اكل، وتأذون خلق الله من الروايح اللي تطلع منكم. • ما له داعي مخامط كتب الطبخ من الجمعيات والمكتبات بس علشان فلانه اللي وياج بالدوام عندها نفس الكتاب.
• ما له داعي التجمعات بالواجهات البحرية قبل الأذان بسيارتك انت مع ربعك وتقعدون تخوزرون بخلق الله وهم يمشون.
• ما له داعي تصير فجأة مفتي وتقول حق رفيجك بالدوام عادي اذا انت مدمن على القهوة تقدر تشمها وما تفطر.
• ما له داعي وانت واقف عند الإشارة تطلع المصحف وتقرأ يعني انا اللي قاعد اسوي ختمه وما بي اضيع ولا دقيقة من وقتي.
• ما له داعي الهواش بالجمعيات على العربانات جنكم تطبقونا «كلوا ماعندكم ترا الحشر باجر».
دعوة من القلب
دعوة اطلقها من صميم واعماق قلبي في هذا الشهر لنبذ كل الخلافات والمشاكل، ونبدأ بصفحة جديدة عنوانها الحب وختامها التسامح. لنرسم البسمة على الشفاه ونترك التبوز والتقلدم والتكشر، لنودع الظلام ونستقبل الصباح، ليحيا قلبنا بانشراح. لتكن قلوبنا بيضاء ونترك البغض والحسد والنميمة عنا، لنتمنى الخير للغير كما نتمناه لنا، حتى يبارك لنا الله في عمرنا وعيالنا وأموالنا.
آخر الكلام
اعتذر واطلب السماح من كل شخص اخطأت او اسأت في حقه، واسامح كل من اخطأ او اساء في حقي.
اللهم اني عفوت عن عبادك فاجعل لي مخرج أن يعفو عبادك عني.
