جريدة الرؤية : 6/10/2009
كتب : فيصل المزين
رسالة إلكترونية انتشرت في الآونة الأخيره بشكل كبير ولافت للنظر أحببت ان أشارك القراء التعليق عليها…
· شهالديرة اللي ما فيها أدباء ولا فلاسفة ولا فنانين ولا شعراء ولا فقهاء ولا علماء ولا رياضيين ولا اقتصاديين ولا أوبرا ولا متاحف ولا آثار ولا معارض!
· شهالديرة اللي فيها طيران عمره ما طار بالوقت والمضيفين يحتقرون الركاب وما تطير طياراتها إلا حق دكار بومبي وسيلان!
· شهالديرة اللي محد فيها يحترم قانون المرور، والسيارة تنساق مثل ما تنساق سيارات التصادم، كل من يحد كل منوكل من يخز كل من وكل من يكره كل من كل من يقط زبالته بالشارع هذا ينظف طفايته بالشارع وذاك يقط كيس الماكدونالدز بالشارع وذاك يطشر قطف زجارته بويه إللي وراه هم بالشارع وذاك ياخذ شور بالشارع وسلم لي عالأدب وتقوله يالحبيب عيب ما يصير! قال لك: كيفي كويتي!
· شهالديرة اللي فريقها يوصل كأس العالم سنة 1982 ويطلع الأخير بكأس الخليج سنة 2007! ويفوز بكأس آسيا سنة 1980 وما يقدر يوصل نفس الدورة سنة 2007!
· شهالديرة اللي اللاعب فيها لما يسجل هدف ربعه اللاعبين يطبون على رئيس النادي ويبوسونه!
· شهالديرة اللي ينطق فيها الضابط بلبسه والطبيب بعيادته والمدرس بمدرسته!
· شهالديرة اللي كل شي فيها بالواسطة – سرير بمستشفى بواسطة – تعيين بوظيفة بواسطة – موعد طبيب بواسطة – والليسن بواسطة – وأتدخل أعيالك مدرسة خاصة وتدفع فيها دم قلبك بواسطة – تلعب بالمنتخب – هم بواسطة!
· شهالديرة اللي أهم اهتمامات الشباب فيها إن يظبط بنات حتى لو غصب، يفتح باب سيارتها غصب، يرقمها غصب، يتل حجابها غصب، شنو حرب!
· شهالديرة اللي.. البنات المتحجبات يحطون قوطي نيدو تحت حجاباتهم ويقولون ستايل!
· شهالديرة اللي.. إللي الريال يطلع مع زوجته وكل الشباب يخزونها بلا حيا ولا مستحى….! والريال فقير مو عارف شسوي!
· شهالديرة اللي كل شبابها معضلين!
· شهالديرة اللي.. فيها الخدامات عندهم موبايل….! والسايق موبايل….. والصبي موبايل….! والياهل إللي عمره 3 أيام…. موبايل!
· شهالديرة اللي.. فيها البنغالية أكثر من عدد الشعب!
· شهالديرة اللي الشعب صار له 20 سنة يتحلطم على نوعية أعضاء مجلس الأمة! طيب منو انتخبهم؟ سكان الأسكيمو!
· شهالديرة اللي فيها مذيع الراديو يظغط المتصلين! كله ظغاط ظغاط ظغاط !!! وبعدين…. لو تسأل المذيع وين آيسلندا قال يم….. تنزانيا!
· شهالديرة اللي.. أشهر مذيع فيها من نوعية : ( ????? ) !!! ما يذكركم بلاري نغ!!
· شهالديرة اللي.. التعليم الحكومي فيها تحت الصفر! ومدرسة الابتدائي تكتب للتلميذات على اللوحة: أنتي فتات….. يعني : أنت فتاة!
· شهالديرة اللي.. فيها الأوادم السنعة ضايعة…. والمطرب ( ؟؟؟ ) يستقبله بالمطار 20 ألف آدمي!
· شهالديرة اللي.. ماتعرف بناتها من شبابها كلهم لابسين polo او نظارة ريبان شنو كلكم نفس الستايل!
· شهالديرة اللي.. بس تطلع شغله الكل يبي يشتريها حتى لو يتسلف واللحين هابين بتلفون بلاك بيري ويدلعونه يسمونه بيبي!
· شهالديرة اللي.. جرايدها تكتب بالبنط العريض: مطرب ستار أكاديمي صورة مشرفة للشاب الكويتي!
· شهالديرة اللي.. الكتاب ينباع فيها بربع دينار….. ومحد يشتري!
· شهالديرة اللي.. كل ما تكلم واحد قال لك: يبيله! شنو يبيله؟
· شهالديرة اللي.. كلها صراخ ونجره ولويه وسب وقذف وبوق وحرمنه ورشاوي وشراء أصوات…. وبعدين يقولون: ديموقراطية!
· شهالديرة اللي.. حطمت الأرقام القياسية بعدد المرضيات والتزرق من الدوام وبعدين يقولون: زيدوا معاشاتنا!
· شهالديرة اللي.. كل من يمر بشارع الخليج يتلفت!
· شهالديرة اللي.. الكل فيها صاروا منافقين يضحكون بالويه او يطعنون بالظهر!
· شهالديرة اللي.. لمى يفوز واحد في برنامج حفظ القرآن محد يستقبله ولايدرون عنه. او لمى اي يواحد من ستار اكاديمي ولا 30 الف ينطرونه بالمطار!
· شهالديرة اللي.. مايصلون الى شهر 12أو 6 علشان امتحانات آخر السنة.. وايد ناس قاعده تضحك الحين!
· شهالديرة اللي.. شبابها بالصيف كلهم يبون يسوون برونز!
· شهالديرة اللي.. شبابها وبناتها كلهم قزيزه اوكل اسبوع بمطعم وكله يشكون ماعندنا فلوس!
· شهالديرة اللي.. لازم الكل يوم السبت يروح الافنيوز او يقعدون «ابلورنزينو» يعني قزيزه!
· شهالديرة اللي.. فيها كل هالبلاوي أو أكثر ويقولون…. الله لا تغير علينا!
– أما تعليقي الشخصي فكــان «اللهم ادفع عنا البلاء وسوء القضاء وشماتة الاعداء» لقد تم تلطيف بعض الكلمات وذلك احتراما للذوق العام!
فما هو تعليقك عزيزى القارئ؟
